نِنای  قِصه

چِتی بورِم سِرِه نِنا مِرِه کِشِنه          

                                        بَبه کِلومِ دِلِه مِره رَسِن کَشِنه

چِتی نِنا رِبوّم کِه مَنگو گوم بَهییِه

                                        تَلِم وِلِشتِ دِله هَنوز پیدا نهیه

هِوایِ پاره بَهی وارِش چِه لَس نَدِنه

                                       بِنِه تیل بَهی کِه کَلوش رِ پَس نَدِنه

تِمومِ مِلک و مِلا،مِه وَنگ و وا دَپیته

                                       مِه چش پِرِ اَسری ،صَرا رِ وا دَپیته

خِدا مِه بَختِ کَهو کِمین خِرابه دَرِه   

                                         هَر وَر رِ اِشِمبه نَویمبِه کِجِه دَرِه

اِزارِ چِلّه تَن شِه دِل رِ دار بَزِنِم

                                        سیو اِقبالِ دِله شِه وِسّه زار بَزِنم

شِه دِلِ غِرسه جا صَرا رِ تَش بَزِنم

                                    تِمومِ آسِمون رِ صَرایِ کَش بَزِنِم

نِنا بَته که اَگه اَمشو بی مَنگو بِهی

                                      هَمین دِرازِه راه رِ وِنه هاکِنی پِهی

اَندِه تِه رِ بَروشم کِچیک و خُردِ پَلی

                                   کِه تا دیگه تِه بوهی بی مَنگو سِرِه نِهی

نِنا گِته اَمِشو تِنِه عَزا هِنیشِم

                                    کِلاج بیارِه خَوِر سیو قِوا هِنیشِم

تِه دَسّ و پَنجه رِ مِن اَگِر نَکِردمِه گِلی

                                    تِه جا مِن کَمتِرِمِه اِنگار کِه یاد بَکِردی

کِجه اِسا بَتِجِم تا شو مارمار هاکِنِم

                                   وِرگون و شالِ چِش رِ بَیرِم بیدار هاکِنم

چِتی اِسا بَتِجم مِه تَن رِ دَم دَنیه

                                         کی بَته مِه دِلِ سَر  دِنیایِ غَم دَنیه

صَرا رِ بَیته میا نِنِه مَنگویِ چِمِر

                                        مِه دِلِ بِرمِه زاری ،هِمِن رِ هاکِرده پر

وِشنا اِشکِمِ پِلا کِنِس و وَلیکِ تیم

                                        صَرایِ خال و تَلی بَوِردِه مِه گِلِ دیم

بِلا کِه شو بَووشِه مِه تَن رِ وِرگ بَخِرِه

                                       هِوا شِلاب دَهیرِه مِره وارش بَوِره

مِه راه هاکِردِه نِشون،اِسا بَهیه چِه گوم

                                      هِوایِ وا و وارِش نِخوانِه بَوّه تِموم

مِرس و توسکای میون دِوارِه دِمبه اویا

                                      نا دَم دَرِه هِمِن رِ، نا اتّا زِنده پیدا

 گِمون بَخِرده پَلِنگ نِنایِ زرّینِه گو

                                     بِرمِه و غِرصِه مرِه اَمون نَدِنه تاشو

اِفتاب دَرِه شونه ِمار دَرِنه اَی نِماشون

                                  بورِم کِه اَی اَمِشو دَره شیشه مِنِه خون

هِمِن سیو مِکِنا نِنه کَکّیِ مِغوم

                               کَلوش رِ دَس هاییرم ،این راه نَوونه تِموم.

+ لینک مطلب +

نوشته شده توسط رضا صدیقی در چهارشنبه یازدهم دی 1387 ساعت